SEKLUSYON: KWENTO NG PAGKA-BALINTUNAY (Panunuring-Pampelikula)

-
SEKLUSYON: KWENTO NG PAGKA-BALINTUNAY
(Panunuring-Pampelikula)
ni Kristine Mae N. Cabales

            Isa sa mga inaabangang pelikula na pasok sa MMFF ay yaong may mga tema ng misteryo o katatakutan. Hindi nawawala ang ganitong klase mga pelikula sapagkat mayaman rin naman sa kababalaghan ang kultura nating mga Pilipino. Ang mga pelikulang ito rin ay nagpapakilala ng mga ‘di pangkaraniwang pangyayari sa buhay. Maaaring ang ilan ay hindi naniniwala, lalo na’t naririto tayo sa modernong panahon, ang iba nama’y umuugat pa rin sa kasaysayan, kung bakit may mga pinaniniwalaan tayong mga ganitong kwento hanggang sa ngayon.
            Ang pelikulang Seklusyon na nasa ilalim ni Direk Erik Matti, ang nakakuha ng pinakamataas na kita sa nagdaang Film Fest. Hindi kataka-taka, dahil karamihan nga sa naging entry sa Film Fest na ito ay hindi nakasanayan o hindi gugustuhing panoorin ng nakararaming Pilipino. Ngunit hindi ito usapin lamang na ang Seklusyon ay ‘horror’ kaya ito ang kumita, mali, sapagkat tumabo rin ng iba’t ibang parangal ang pelikulang ito, lalo na’t pagdating sa produksyon. Patunay, na ang gawang Erik Matti ay talagang natatangi na naging dahilan kung bakit siya pinarangalang Best Director.
            Ano ang kaibahan ng Seklusyon sa ibang ‘horror film’? Bukod sa halaw ito sa totoong kwento ng nagaganap na seklusyon para sa mga magpapari, ito ay kwento na nag-iwan rin ng tanong para sa mga mananampalataya. Naging malaking adbentahe ang kahusayan ng editing team sa pagdaragdag ng gulat at kilabot sa bawat eksena ng pelikula. Ang pag-arte ng mga tauhan sa kwento ay napakahusay rin. Nagawaran ng Best Supporting Actress si Phoebe Walker, na gumanap bilang Madre Cecilia sa kwento. Nakatulong ang lahat ng aspetong teknikal na ito upang mabigyan ng katarungan ang mensaheng nais iparating ng buong pelikula. Maging ang lugar kung saan ginanap ang bawat eksena at ang mga kasuotan ay sobrang makatotohanan rin. Ang editing ng mga eksena ay napakahusay kaya pinarangalan rin sila ng Best Cinematography. Ang kagustuhan nilang mapaniwala ang mga manonood na ang kwento ay halaw sa pangyayari pagkatapos ng Digmaang Pandaigdig ay naisakatuparan. Nagwagi rin ng Best Original Theme Song ang pelikulang ito na ‘di kataka-taka sapagkat sadyang nagdulot ng kilabot ang awit na ginamit sa pelikula.
            Naging matapang ang pelikulang ito sa paglalahad ng mga kaisipang maaaring ‘anti’ sa simbahang Katoliko, ngunit magkagayunman naging maingat pa rin sila sa pagsisipi ng mga berso mula sa Bibliya. Maganda ang mensaheng nais iparating ng pelikulang ito, maging sa ibang bansa ay may mga pelikulang patungkol sa mga itinatagong katotohanan ng simbahan. Nalalaman ng mga tao sa loob nito kung ano ba ang totoong nangyayari sa paligid, kung bakit may mga kababalaghang nagaganap na hindi kayang ipaliwanag ng agham gaya na lamang ng ‘faith healing’.
Ang karakter ni Rhed Bustamante ay isang imahe ng mga mapagpanggap na propeta, ngunit masasabi natin na magpahanggang sa ngayon marami pa rin ang mga nagpapakilala na sugo ng Diyos para sa salapi. Ngunit base na rin sa kwento, hindi lamang pera ang habol ng mga nagpapanggap na ito, ang totoong pakay nila ay upang ilihis ang paniniwala ng mga mananampalataya sa ibang diyos na kanilang sasambahin.            
Sa wakas ng pelikula, napuksa man ang mapagpanggap na propeta, naisalin na nito sa mga magpapari ang kaisipang baluktot at lihis sa pagsunod sa utos ng Diyos. Patunay na sa matagal na panahon, hindi tayo sigurado kung ang mga kaparian ba ay talagang tapat sa pagmamahal nila sa Panginoon. Ang lituhin ang mga mananampalataya ang talagang pakay ng mga pekeng propetang ito, pinasok ang simbahan upang hindi na malaman kung paano ituturing ang mga peke sa totoo.
            Matthew 7:15 Beware of the false prophets, who come to you in sheep’s clothing but inwardly are ravenous wolves.
            Gaya ng karakter sa kwento na nagpanggap bilang musmos na nakapanggagamot, mapagpanggap ang demonyo at hindi natin nalalaman kung sino ba talaga ang sino.


-FIN

Mga Komento

Mag-post ng isang Komento

Mga sikat na post sa blog na ito

PAMILYA ORDINARYO: Hubad na Suri sa Isang Realistik na Pelikula

-
(Setyembre 17, 2016) PAMILYA ORDINARYO: Hubad na Suri sa Isang Realistik na Pelikula                         Gaya ng ibang Indie Film , ang Pamilya Ordinaryo ni Eduardo Roy Jr. ay tumatalakay rin sa palasak na paksang mauunawaan at maiuugnay sa totoong buhay ng nakararami. Mula sa salitang ordinaryo o karaniwan, ang pelikula ay naglaman ng istorya  na maaaring iugnay sa pangkaraniwang buhay ng isang tipikal na pamilyang Pilipino. Ngunit gaano kaordinaryo ang pamilya Ordinaryo?             Si Aries Ordinaryo na ginampanan ni Ronwaldo Martin ay isang 17 taong gulang na batang kalye na asawa naman ng 16 taong gulang na si Jane na ginampanan ni Hasmine Killip, na bagaman baguhan sa pagsabak sa Indie Film , nasungkit ang prestihiyosong Best Actress Award .          ...
Magbasa nang higit pa

Mga Pang-ugnay sa Pagbibigay ng Sanhi at Bunga

-
Paksang-Aralin Mga Pang-ugnay sa Pagbibigay ng Sanhi at Bunga Sa pagtuturo ng gramatika, hinihimay-himay ang katuturan ng bawat salita upang lubos na maunawaan ng mga mag-aaral, at upang ito’y kanilang magamit sa angkop na mga pagkakataon. Ang mga salitang pangnilalaman (content words) na siyang nagsasaad ng mga paksa at panaguri ay madaling nakikilala sa tulong ng mga salitang istruktural (functional words). Kaya masasabing bawat salita na nakapaloob sa isang pangungusap ay nagtataglay ng iba’t ibang gampanin sa paghahatid ng tiyak na mensahe sa komunikasyon.             Ang yunit na ito ay nakatuon sa iba’t ibang mga pang-ugnay (connectors) na ginagamit sa pagbibigay ng sanhi (cause) at bunga (effect) na siyang ginagamit natin sa mabisang paglalahad ng isang pangyayari. Malalaman din dito ang kahalagahan ng pagbibigay ng malinaw na mensahe lalo na’t nakapaloob ang pagbibigay ng naging sanhi at ang magiging bunga nito. M...
Magbasa nang higit pa

Sikolohiya sa Loob ng Ilang Awitin ni Gary Granada at mga Kwento ng Pakikibaka sa mga Lunggating Maka-Pilipino

-
Sikolohiya sa Loob ng Ilang Awitin ni Gary Granada at mga Kwento ng Pakikibaka sa mga Lunggating Maka-Pilipino ni Kristine Mae N. Cabales Abstrak             Ang papel na ito ay naglalaman ng analisis sa mga awiting naisulat at itinanghal ni Gary Granada sa loob ng tatlong dekada. Bilang isa sa haligi ng Original Pinoy Music (OPM), nakilala ang kanyang mga awitin, higit lalo noong ‘80s dahil sa mahusay na paglalarawan nito ng mga kwentong-buhay ng isang ordinaryong mamamayan at ang pakikibaka nito sa araw-araw. Sa papel na ito, tatangkaing himaymayin ang bawat awitin upang madalumat ang Sikolohiyang Pilipino na tinataglay ng mga mensahe nito. Ang awit bilang isang sining ay naglalaman rin ng lantad at di-lantad na kahulugan, na maaaring nagsasaad din ng iba pang kwento bukod sa lantay na pakahulugan ng ilang tagapakinig. Sisikaping iugnay ang nilalaman ng mga awiting ito sa iba’t ibang sikolohiya ng lahing Pilipino, sang-ay...
Magbasa nang higit pa